الى غادة عبد العال...فضحتينا وعند فيكى مش عاوزه اتجوز  

Posted by: هبة العفيفي

الى غادة عبد العال...فضحتينا وعند فيكى مش عاوزه اتجوز..مشاكل وصلتنى وعاوزين رايكم
                                                         بقلم: هبة العفيفي

فى العاشر من رمضان سنة 1973 كانت البلد بتمر بنقله على كافة المستويات ، كانت الناس بتحارب عشان تحرر وطن، ناس بتموت..عائلات اتشردت وستات اترملت وامهات ماتو مليون مره حزن على ولادهم ... بس البلد اتحررت
فى العاشر من رمضان سنة 2010 كانت البلد بتمر بنقله برضوا ضغط سياسى ، حاله من الا رضى العام ، إحساس بالظلم، الغلا، الفقر حاله سياسيه وشعبيه تبشر بانفجار غليان بقاله اكتر من 20 سنه ربنا وحده اللى يعلم ايه اللى هايحصل بعده ، احساس بشع وصل لاغلب المصريين انهم متهانين فى كل بلد وكل مكان وان المصرى بقى رخيص لاحق له فاصبحت الجنسيه المصريه حمل ثقيل على حامله داخل الوطن وخارجه ، احساس الخوف الذى يسيطر على المصريين فى الخارج " اموت ودمى يروح هدر وماحدش يجيبلى حقى " يموتوا غيره يموتوا اضطهادا ... مهو مصرى!!
رمضان 2010 الناس قررت ترتاح وتاخد هدنه عشان يعرفوا يكملوا الهم والغم والمشاكل اللى فى البلد بعد رمضان وإتحولت ساحة الفيسبوك من انصار خالد سعيد ومؤيدى البرادعى لسؤال واحد يتكرر عند اغلب الناس .. متابعين مسلسلات ايه السنه دى ؟؟
شوفتى عايزة اتجوز؟؟ ايه رايك؟؟ حلو! وحش!! ايه الافوره دى ؟ هو الكتاب احلى ولا المسلسل؟ طيب هى هند صبرى اتجننت؟! يا عينى يا غاده هو المسلسل ضيع نجاح الكتاب ولا ايه؟؟
وخد من الاسئله دى كتير وما ادراك ما الشعب المصرى عاوز جنازه يشبع فيها لطم او فرح يشبع فيه زغاريد اهى هيصه والسلام.
الحقيقه بقى ان المسلسل عامل نسبة مشاهده عاليه والا ماكانتش الناس هاتتكلم عنه بالشكل ده اتفق ولا اختلف هقولكم رايي فى الاخر بس مبدايا هو متشاف ونتيجه لكده وصلتنى رسايل كتير من اكتر من بنت وولد ضد ومع المسلسل بس الحقيقه دى اكتر واحده اثرت فيا رسالتها بقى كانت بتقول ايه :
عمرى ما حسيت انى عجزت قوى كده وان عندى 31 سنه وماشيه فى ال 32 احنا عيله بتهتم قوى بالتعليم والشغل والجواز عندنا كل شيئ فى وقته ونصيبه وانا بصراحه لا بجيب كتب ولا بحب القرايه من اصله فمسمعتش عن كتاب عاوزه اتجوز غير انه كتاب ناجح وعامل مبيعات كويسه والبنات مبسوطه منه بس الوضع اختلف كتير لان المسلسل خلى الكتاب يجيلى لحد عندى وهنا كانت المشكله للاسف امى غيرت معاملتها معايا بدات تقولى انى عنست وعجزت وطلعلى شعر ابيض وفرصى فى الجواز قلت وفرصى فى الخلفه ابتدت تنعدم الكلام ده كل يوم بسمعه قبل وبعد ووسط الحلقه وبقت تقولى اعملى زيها اشمعنا هى هتموت وتتجوز ! حتى زمايلى الرجاله ابتدوا يتغمزوا ويتلمزوا عليا ما انا البنت الوحيده فى الشغل اللى سنى وصل للتلاتين ومش متجوزه وكل ما اجى اهزر مه حد فيهم يقولى " جرى ايه يا ست علا انتى هاتشغليلي مصيده العرسان ولا ايه" طبعا علا دى بطله المسلسل ! امى خوفها زاد قوى لدرجه انها بتسال جيرانا على عريس وبتسال اخواتها واصحابها فى الشغل حتى اللى كتجوزين عندى فى الشغل بقوا يدورولى على عريس الكل فاكر انى نسخه طبق الاصل من علا بريل على الرجاله وماشيه بحلم بالجواز فى الشارع .. هبه بما انكم كاتبات زى بعض قولى لغاده " فضحتينا يا غاده... وعندا فيكى انا بقى مش عاوزه اتجوز " يا ستى مش عشان سنى كبر شويه ابقى مافوره كده وبريل على اى دكر والسلام انا عمرى ما شوفت بنت ملهوفه كده زى البطله بتاعتك وحتى يا ستى لو فيه ليه الفضيحه بالشكل ده قوليلها انا بقيت مكسوفه اقول للناس سنى ليقعدوا يشبهونى بهند صبرى وابقى تريقة ومسخة القاعدة .
دى نص الرساله اللى وصلتنى وجالى شبهها كتير وفى ولد بعتلى رساله من سطر واحد قالى :


" طيب ما البنات طلعت تافهه اهى والكل عاوز يتجوز وخلاص احنا بالنسبالكم كنز بتجروا وراه عشان ماتقعديش ترغى كتي فى البنت وحقوقها وشغلها كلكم فى الاخر زى علا ...عاوزين تتجوزا وخلاص بجد انتوا تافهين "
انا بقى شخصيا اتعرضت لموقف سخبف احب احكيه لكم بكمله القصص يعنى ، بما انى وسيله مواصلاتى الاولى بعد مترو النفاق هو الميكروباص فانا دايما بحب اقعد جنب السواق وادفع اجره الكرسيين عسان ماحدش يضايقنى من كام يوم جه شاب يركب جنبى فقولتله بمنتهى الادب معلش انا دافعه الكرسيين فبصلى من فوق لتحت وغمزلى بعنيه وضحك ضحكه صفرا وقال" ما خلاص اتفقستوا.. افتحى بقى واداخرى وبطلوا الحركات دى انتوا اتفضحتوا خلاص" لسه هابتدى اشتم السواق قاله انت تعرفها يا كابتن قاله : " مصر كلها عرفتهم ده احنا رجاله غلابه يا عم الحاج هو انت مابتتفرجش على عايزه اتجوز ولا ايه؟!
خلاصة الكلام انا عاوزه اقول كلمتين كده لكل اللى بيتكلم عن المسلسل وعن غاده اللى اصلا ماعرفهاش شخصيا
اعتقد ان اى حد من حقه يحلم بالنجاح والشهره والنجوميه والانتشار والكلام الحلو ده وبردوا من حق اى حد ينقد بالسلب او بالايجاب بس بالادب ومافيش حاجه فى الفن اصلا اسمها عمل حلو وعمل وحش ومنيل بنيله ده كده مش تقييم ولا نقد ده كده ناس قاعده على المصطبه بتجيب فى سيرة مخاليق ربنا ، المهم بقى فى الموضوع ان اللى حاصل حةوالين المسلسلات السنه دى يخلينى متاكده ان للفن والادب فى الفتره المنيله بنيله اللى مصر بتمر بيها دى رساله مهمه جدا يعنى يا يرتقى بينا يا ينيلنا بنيله ، يا ينورنا ويفهمنا ويوعينا يا يخدرنا ويتوهنا وينقلنا من جهل لجهل وقله قيم
نرجع بقى للمسلسلات ، الفكره مش ان غاده فضحت نموذج من البنات موجود ، الفكره ان انا ضد فكرة التعميم واحنا للاسف شعب يعمم كل شيئ انا مع جدا ان لو حد يمتلك قلم وشايف حاجه او شايف عيب ما موجود فى حياتنا ينقله زى ما هو ويكون مرايه للى بيحصل عشان الناس تفوق بس من غير مبالغه ولا تتفيه وتقليل من قيمة اللى بيتناقش عشان الرساله توصل صح ببساطه كده عمركم شوفتوا نفسكم فى المرايه زايدين ايد ولا ناقصين رجل اكيد لا
اه فى مشكله عندنا فى الجواز بس ده على المستويين البنت والولد اه فى بنات ملهوفه على الجواز ماااشى من حقهم طالما هما اختاروا حياتهم ما اجبروش على حاجه ، من حقك يكون الجواز اهتمامك الاول بس مش من حقك تقولى ان كل البنات كده .
اما بقى اللى بيتكلم عن هند صبرى فمن وجهه نظرى هى ممثله هايله نظرا لكل اللى عملته قبل كده وهند مش واقفه لوحدها فى المسلسل وراها مخرج شغلته يوجهه لو فى اى افوره فى الاداء يعنى شغلانته يخرج من الناس اللى معاه احسن حاجه عندهم من اول الكتابه لحد التمثيل والتصوير وكل حاجه اى عمل فنى ليه ثلاث اضلاع المؤلف والمخرج والممثل وطالما الناس شايفه ان فى مشكله يبقى اكيد ضلع من دول فيه مشكله.
وبعد كل ده ايقنت قد ايه القلم مهم جدا وان فى سنه تغيير وجهه نظر وتغيير عادات مجتمعات وتحويلها من حال لحال تانى خالص بس على الله نفهم اهميته ! فى بلد لا ترى مهم سوى رجل السياسه ومن بعده الدين والراقاصات والعاهرات يعنى من يمين اليمين لاقصى الشمال الشمال !
اخيرا من حق كل واحد يكبر احلامه ويشوف شغله احسن حاجه فى الدنيا ومن حقك تتفق او تختلف بس خلى بالك ده مجهود وتعب وسهر اما الاخ اللى بعتلى الرساله والاخ بتاع الميكروباص احب اقولكم اسالوا سؤال لنفسكم هو انتوا مش بتتولوا على هيفا لما بتترقص فى التليفزيون لو كانت اجابتك مش كلنا كده ودى اذواق يبقى هقولك طيب ماتقول لنفسك يا خفيف !
لما يكون الموضوع ليه علاقه ببنات ونظره مجتمع وسمعه بناته اعتقد الموضوع محتاج تفكير اكتر
ولولا اختلاف الاذواق لبارت السلع وعلى راى انجى على مره قالت اللى مابيحبنيش يقلب المحطه عادى يعنى ...... وعجبى

This entry was posted on الأحد, أغسطس 22, 2010 . You can leave a response and follow any responses to this entry through the الاشتراك في: تعليقات الرسالة (Atom) .

1 التعليقات

إرسال تعليق